Ingan kami pulung gundari bage rumah seribu jabu
Kerina kalak terudu nadingken kuta kami radu
Inget aku nderbih sora megang arah deleng nari terbegi saru
Deleng Sinabung si meganjang si teridah arah rumah kami erlenggur
Kuta kami si mbergeh ras si mejile guntar
Kubegi sora nande ras bapa gelah kami ula mbiar
Ku arah ja kin ndia nggo kami tergiah-giah
Pulung kami kerina emaka radu ku jenda
Bas ingan enda kami man medem ersada
Kami danak-danak meriah ate kami kerina
Perban kai pe si terjadi gundari ijenda
I idah Bapa si ni surga
Deleng si meganjang nggo itinepaNa
Kerina isi doni Ia sinjadikenca
Emaka kami danak-danak ijenda metehsa
Dibata nge kerina si empuna
La lit kebiaren bas ate kami nari
Ntah kin gia la lit kecibalen kami
Tuhanlah tetap singkawali kegeluhen teptep wari
Taneh Karo si mejile
I uruk deleng si meganjang
Kami ijenda ertoto man bandu jine
Gelah ula nari sorandu megang
Kami anak-anak kuta ijenda
Ersada arih kami man banta kerina
Gelah ula atendu aru perban kejadin enda
Mari sitotokenlah kutanta gelah jore mulihi taneh ras sabahta
Nggo si idah tan Dibata ngataken Bana
Ise si la nggirgir adi Ia merawa?
Emaka ula medu ertoto kita
Gelah banci kita erdemu ersada kata, Tuhan si mada Kuasa
Bapa ras nande ula aru atendu
Perban jabu ras rimo la banci asuhndu
Lit nge pagi waktuna mulih kita radu
Tawa ras rende ka kita bage nai I tengah jabu
Bulang ras tudung ula kam mbiar
Gegehlah ertoto ula kam gurgar
Man ras minemlah kam gelah kena segar
Ingetlah pedah Dibata rendelah gelah kam tegar
Pulunglah kita kerina ersada ukur
Enda nge turi-turin si banci jadi inget-ingeten pusuh
Bage pe turi-turin si banci iceritaken kami pagi
Uga belinna kuasa Dibata ras kekelengenNa njagai kami
Pulunglah kita rende ras ersurak
Perban ibegi kami sora Dibata arah kejadin enda kerina
Lit kerina tujunna ras rencanaNa si mbelin
Gelah sada ukur ras sisampat-sampaten kerina kalak Indonesia.
Ikataken kami bujur man bandu kerina
Anak-anak Indonesia si nggo mbegi berita kami I jenda
Nggo totokenndu kami gelah tenang pusuh kami
Dibata nge pagi masu-masu kam kerina
Bagelah arusna kerina kita si sampat-sampaten
Adi sada mesui kerina rikut mesui
Perban nggo irakut kita ersada
Bas dareh Tuhan Yesus sada gereja
Amin
Nancy Meinintha Brahmana
20 September 2010
Tidak ada komentar:
Posting Komentar