turang karo mergana, turang sintua,
turang karo mergana lebuh-lebuhenku, dilo-dilonku
ija nge kena tengahna nduari
makana enggo me kap piga-piga tandai bulanna
lalap kel nge kena la kuidah turang
emakana turang enggo me kap ser-ser desa si waluh
kena jine kudarami
lalap kel nge turang kita bage la jumpa
emakana turang enggo me kuidah tumpat
ukur beru karo turang, anak singuda
emakana dage turang
entah apai gia kena kerina simbayangken
singiketken turang karo mergana ndube
dage, adi mekuah kel ateindu
tang-tangi kel turang karo mergana
ibas batang kayu cingkam nari ndadei
enggo bage turang, tinggel-tinggelken kena
begiken kena bage beru karo erlebuh
begiken kena, tinggelken kena beru karo erdilo
turang,
emakana turang adina enggo begi kena
jine beru karo erlebuh
turang sempatken kena kel pagi jine bage
gelah malem kel ate beru karo turang
emakana dage,
nande bapa kerina
silaerpilihen sila erndobahen
apai pe kam labo erpilih
apai pe kam labo erndobah
dage tang-tangi kel dage turang karo mergana
ibas bayangen kayu cingkam nari ndai
si enggo bage jine erbelang-belang bage utangna
beru karo kel pagi jine mbalikenca
emaka dage, bapa simbelang enterem
nande bibi simbelang enterem
maka dage,
adi balbal kam pagi pola
tengah kerangen limbur raya si mbages
dilo kel pagi beru karo
emkap gelarna beru sibou
emaka reh pagi nina simbalbal
"mari turang beru sibou
enda kel jine utangku mbelang si lanai tergalari
ei kam nge jine pagi nggalarisa
kam jine pagi mbayarisa
amburken kel iluhndu mambur
sierdetang-detang si erdire-dire
pagi-pagi keraben,
asa buena asa lalana
kel pagi amburken iluhndu erdire-dire
e beru sibou"
nindu kel pagi jineken
emakana nande bapa kerina
aku pe pagi kuamburken mei iluhku erdire-dire
asa buena asa lalana pagi jine kuamburken
mbaliken utangndu si mbelang e
bapa nande kerina
emaka syarat-syarat kel pepagi
ula kel pagi kam jine mediker man pindon
entah apai kin gia pagi
entah apai pagi kelihen
ula kel kam pagi jine erdua merekenca
bage nina beru sibou
o, nande bapa kerina
emaka dage bapa simbelang enterem
nande bibi kemberahen kerina
maka adi enggo kam bage pagi kam jumpa
inget kel pagi beru sibou
o, nande bibi kerina
bapa kerina,
em kap tutu kel pagi bangku cimpa
emkap jine cimpa gabur-gabur
jine man panganku
emaka adi kurang-kurang tole kam pepagi
jine iluh beru sibou
tole kurang kange iluhndu mambur ndai
lenga tembe utang mbelang ndai bage nindu pagi
emaka pagi jine enggo tembei nindu
langa tembei utang mbelang nda beru sibou
--------------------
turi-turin perpola
Tidak ada komentar:
Posting Komentar